წევრები

კორპორაცია ქინძმარაული მდებარეობს ქალაქ ყვარელში, ისტორიული ყვარლის ციხის ტერიტორიაზე. მეფე ერეკლეს მეფობის დროს, როგორც  სხვა სამეფო ღვინის მარნებში, კორპორაცია ქინძმარაულის საწარმოშიც დიდგვაროვნებისთვის ღვინო იწარმოებოდა.

საწარმო ქინძმარაულსა და ყვარლის მიკროზონებში ფლობს 150 ჰექტარ ვენახს, საიდანაც 100 ჰექტარი ქინძმარაულის ტრადიციულ მიკროზონაშია გაშენებული. ყოველწლიურად კომპანია აწარმოებს 25 სახის ღვინოს და 10 მდე სახის ღვინის ბრენდს, როგორც ჩვენი საკუთარი ვენახებიდან მოწეული ასევე ადგილობრივი გლეხებიდან შეძენილი ყურძნისგან. აღნიშნული პროდუქციის ექსპორტი ხდება მსოფლიოს 19 ქვეყანაში და იყიდება აგრეთვე ადგილობრივ ბაზარზე.პროდუქციის მაღალ ხარისხზე  მეტყველებს ადგილობრივ და საერთაშორისო ღვინის გამოფენებსა თუ კონკურსზე მიღებული მრავალი ჯილდო, რაშიც კორპორაცია ყოველთვის აქტიურად მონაწილეობს.  კორპორაცია ქინძმარაული აქტიურადაა ჩართული ღვინის ტურიზმში. მარანში მუდმივად მასპინძლობენ ტურისტებს, აწყობენ მასტერკლასებს და დეგუსტაციებს.კორპორაციის  მფლობელობაშია  ბრენდირებული მაღაზია, რესტორანი და სასტუმრო „შატო ყვარელი“.

“კორპორაცია ქართული ღვინო” 1999 წელს დაარსდა და ძირითად მიზნად ალკოჰოლური სასმელების დამზადება-რეალიზაცია დაისახა. წარმოება თელავის რაიონში, მეღვინეობით სახელგანთქმულ სოფელში, წინანდალში მდებარეობს.

კომპანია ღვინოებს რამდენიმე განსხვავებული სავაჭრო ნიშნით აწარმოებს, რომელთა რეალიზაციაც, როგორც ადგილობრივ,  ასევე უცხოურ ბაზრებზე ხორციელდება. დღეისთვის  „კორპორაცია ქართული ღვინო“  ბევრ უცხოურ კომპანიასთან თანამშრომლობს, რაც ხელს უწყობს კომპანიის ექსპორტის ზრდასა და ბაზარზე ერთ-ერთ ლიდერ კომპანიად დამკვიდრებას.

გემოვნების და ტრადიციების     კანონმდებელი, საერთაშორისო გამოფენა-დეგუსტაციების ლიდერი, იმპერატორთა და არისტოკრატთა წვეულებების მშვენება – “შატო მუხრანის” ღვინო, რომელიც XIX საუკუნეში უმაღლეს საფეხურზე აიყვანა ივანე მუხრანბატონმა, ყოველთვის ღირსეულ კონკურენციას უწევდა მსოფლიოს საუკეთესოდ აღიარებულ ღვინოებს.

დღეს ამ ტრადიციის გამგრძელებელია კომპანია “შატო მუხრანი”, რომლის მიერ წარმოებული უმაღლესი სტანდარტის ღვინოები უკვე ამშვენებს მსოფლიოს სხვადასხვა ქვეყნის პრესტიჟულ მაღაზიებსა და რესტორნებს. იდეალური ხარისხის ადგილობრივმა მოსავალმა, უახლესმა აღჭურვილობამ, უნიკალურმა მდებარეობამ და მაღალმა პროფესიონალიზმმა “შატო მუხრანს” ქართული ღვინის სახელის აღორძინების გარანტირებული შესაძლებლობა მიანიჭა მსოფლიო მასშტაბით.

2007 წელს „შატო მუხრანი“ თანამედროვე ღვინის ქარხნის მშენებლობას იწყებს. 2007 წლის შემდეგ „შატო მუხრანის“ ღვინის დაყენება მხოლოდ მის ვენახებში მოყვანილი ყურძნით ხდება. „შატო მუხრანი“ ამჟამად აწარმოებს ქართულ ღვინოებსა და ალკოჰოლურ სასმელ – ჭაჭას, რომლის დისტრიბუციაც ხორციელდება როგორც „Marussia Beverages”-ის, აგრეთვე ჯგუფის არაწევრი კომპანიების მიერ საქართველოსა და მის ფარგლებს გარეთ.

ბაგრატიონი 1882 საქართველოში ცქრიალა ღვინოების მწარმოებელი ლიდერი კომპანიაა. კომპანიის წილი ადგილობრივ ბაზარზე 80%-ს შეადგენს. ბაგრატიონი 1882 გამორჩეული ისტორიის მქონე კომპანიაა, იგი უკავშირდება ივანე ბაგრატიონ-მუხრანელს, პირველ ქართველს რომელმაც დაიწყო ცქრიალა ღვინოების წარმოება კლასიკური, მეორადი ფერმენტაციის გამოყენებით და 1882 წელს საერთაშორისო აღიარებას მიაღწია.

დღეს კომპანიის მიერ გაწეული ინვესტიციები წარმოებასა და ტექნოლოგიებში საშუალებას აძლევს ბაგრატიონი 1882-ს აწარმოოს ცქრიალა ღვინოები როგორც ტრადიციული მეთოდით, რომელიც თავდაპირველად იყო გამოყენებული შამპანიურის წარმოებაში, ასევე შარმატ მეთოდით რათა შექმნას ცქრიალა ღვინოების ფართო არჩევანი სხვადასხვა სიტუაციებისთვის და გემოვნების მქონე ადამიანებისათვის.

სავაჭრო ნიშანი: Maisuradze Wines

შპს „ ათენა“ კახეთში ახლად გახსნილი ბუტიკის ტიპის მარანია. კომპანიის ძირითადი მიზანი მაღალხარისხიანი და მცირე რაოდენობის ღვინის წარმოებაა. ცნობილი მეღვინე დავით მაისურაძე თანამედროვე და ძველი მეთოდების გამოყენებით საქართველოში  საუკეთესო საფერავს, მუკუზანსა და აის ვაინს აყენებს. ღვინის დაწურვისას კომპანია საკუთარი ვენახების ყურძენს იყენებს. კომპანიის ვენახები კახეთშია გაშენებული.

შპს „ ათენას“ ღვინოები უფრო მაისურაძის ღვინოების სახელითაა ცნობილი აზიის ბაზარზე. ღვინის მოყვარულებს კი 2017 წლის შემოდგომიდან ამ უნიკალური ღვინის გასინჯვასა და ყიდვას საქართველოშიც წინანდლის რეზიდენციაში/ალ. ჭავჭავაძის სახლ-მუზეუმში შესძლებენ.

კომპანია „ბადაგონი“ 2006 წელს დაარსდა და დღესდღეობით მთელს აღმოსავლეთ ევროპაში ყველაზე თანამედროვე ტექნოლოგიებით აღჭურვილ ღვინის საწარმოს ფლობს. კომპანია ბადაგონის პროდუქციის ასორტიმენტი მოიცავს ღვინოებს, ცქრიალა ღვინოებსა და ჭაჭას. ბადაგონი ფლობს 400 ჰა-მდე ვენახებს  კახეთის ყველა მიკროზონაში და ქმნის ღვინოს ყურძნის მხოლოდ ქართული ჯიშებისაგან.

კომპანიის მთავარი ენოლოგი, იტალიელი დოქტორი დონატო ლანატი, მეღვინეობის უმაღლესი საერთაშორისო ჯილდოს – ღვინის ოსკარის მფლობელია და მსოფლიო ენოლოგთა ხუთეულის წარმომადგენელია. მის  საავტორო ღვინოებს შორისაა GAU#5-ის ღვინოები, რასაც თამამად შეგვიძლია ვუწოდოთ ახალი სიტყვა ქართულ მეღვინეობაში.

კომპანია ბადაგონმა თავისი არსებობის 10 წლის მანძილზე ღვინის მრავალ საერთაშორისო კონკურსზე მოიპოვა წარმატება. 2016 წლის ბოლოს ქვევრის ღვინის ისტორიაში პირველი პრეცედენტი მოხდა – ბადაგონის ქვევრის ღვინომ „ალავერდის ტრადიციები“ ჰონგ კონგში გამართულ საერთაშორისო კონკურსზე „Cathay Pacific Hong Kong International wine and spirit competition“ ოქროს მედალი და „საუკეთესო ადგილობრივი ღვინის“ წოდება მოიპოვა. ბადაგონის ქვევრის ღვინო ალავერდის მონასტრის მე-9 საუკუნის მარანში იქმნება, რომელიც კომპანია ბადგონის მეშვეობით 2006 წელს აღდგა.